25º Aniversario - 25 Anos de Historia

FESTA NADAL 25º ANIVERSARIO MURAL DE FIRMAS E PEGADAS

2009-01-01T13:19:00.001-08:00

O sábado 27 de decembro o Club Baloncesto Seis do Nadal - Coia celebrou a Festa de Nadal 25º Aniversario como acto conmemorativo dos "25 Anos de Historia co Deporte Base en Coia", un acto onde se reuniron as xeracións actuais e as xeracións da historia da entidade.

Durante toda a tarde tódolos asistentes puideron deixar a súa firma ou pegada nun mural situado na entrada do pavillón, un xesto que se gardará para a lembranza nesta celebración do 25º Aniversario.

Ao longo de toda a tarde, desde os máis pequenos ata os máis veteráns pasaron por este mural para deixar a súa firma e pegada, testigo do seu paso pola Festa de Nadal na que se celebraban os "25 Anos de Historia" do Club Baloncesto Seis do Nadal - Coia.

FESTA NADAL 25º ANIVERSARIO MERENDA E BAILE DE NADAL

2009-01-01T13:18:00.000-08:00

O sábado 27 de decembro o Club Baloncesto Seis do Nadal - Coia celebrou no Colexio Seis do Nadal a Festa de Nadal 25º Aniversario como acto conmemorativo dos "25 Anos de Historia co Deporte Base en Coia", un acto onde se reuniron as xeracións actuais e as xeracións da historia da entidade.

Despois dos partidos do presente tendo como protagonistas aos equipos federados actuais desta tempada 2008/09 e despois dos partidos amigables interxeracionais o Club Baloncesto Seis do Nadal - Coia invitou a tódolos asistentes a unha merenda para continuar coa xornada de convivencia.

Este foi un dos momentos onde o presente e o pasado da historia da entidade misturouse para dar lugar a lembranzas e anécdotas nadas nos "25 Anos de Historia". Nesta merenda estiveron presentes representantes de cada unha das xeracións do Club Baloncesto Seis do Nadal - Coia que aportaron a súa visión e a súa aportación á Festa de Nadal.

Para clausurar a Festa 25º Aniversario os máis atrevidos e os máis pequenos disfrutaron dun baile de Nadal, onde os máis tímidos tamén tiveron que demostrar as súas habilidades de baile. Ao longo desta actividade final levouse a cabo o sorteo de diversos premios cedidos pola Consellería de Medio Ambiente e por Augas de Mondariz.

FESTA NADAL 25º ANIVERSARIO PARTIDOS INTERXERACIONAIS

2009-01-01T13:17:00.000-08:00

O pasado sábado 27 de decembro o Club Baloncesto Seis do Nadal - Coia celebrou a Festa de Nadal 25º Aniversario como acto conmemorativo dos "25 Anos de Historia co Deporte Base en Coia", un acto onde se reuniron as xeracións actuais e as xeracións da historia da entidade.

Despois dos partidos amigables entres os equipos federados actuais da entidade comezaron os partidos interxeracionais do 25º Aniversario.

Con estes partidos interxeracionais conseguiuse xuntar na pista a un gran número das xeracións que pasaron polo Club Baloncesto Seis do Nadal - Coia ao longo dos "25 Anos co Deporte Base". O obxectivo destes encontros amigables foi reunir na tarde do sábado 27 de decembro a antigos xogador@s, adestrador@s, monitor@s, coordinador@s, colaborador@s e amig@s para que poidesen volver a disfrutar duns partidos nas pistas do Colexio Seis do Nadal.

Ademais estes encontros fixeron posible que moitos integrantes do Seis do Nadal se achegaran á Festa de Nadal 25º Aniversario para pasar unha xornada de convivencia con vellos amig@s e compañeir@s.

Na pista xuntáronse para disputar os partidos xogadores do primeiro equipo Sénior Masculino do Club Baloncesto Seis do Nadal - Coia, xogadores e xogadoras das xeracións 1984, 1985, 1986, 1987, 1988, 1989, 1990 e moitas outras. Ademais tamén estiveron nas pistas e nas gradas protagonistas da historia da entidade (antigos xogadores/as, adestradores/as, etc.) que animaron durante os partidos interxeracionais e disfrutaron dunha xornada de convivencia e de lembranzas.

FESTA NADAL 25º ANIVERSARIO PARTIDOS EQUIPOS ACTUAIS

2009-01-01T13:14:00.000-08:00

O pasado sábado 27 de decembro o Club Baloncesto Seis do Nadal - Coia celebrou a Festa de Nadal 25º Aniversario como acto conmemorativo dos "25 Anos de Historia co Deporte Base en Coia" que se cumplen neste ano 2008 que xa remata, un acto onde se reuniron as xeracións actuais e as xeracións da historia da entidade.

A primeira hora da tarde comezaba o evento con partidos do presente da entidade entre combinados das diferentes categorías dos equipos federados. Participaron nestes partidos amigables máis de 200 xogadores e xogadoras de categoría benxamín, alevín, infantil, cadete e júnior desta tempada 2008/09.

O obxectivo destes partidos foi reunir nunha tarde e nunha pista ao presente do Club Baloncesto Seis do Nadal - Coia para celebrar os "25 Anos de Historia" e para vivir unha xornada de convivencia nestas festas de Nadal.

Os equipos actuais do club foron o punto de saída dun evento que tivo numerosos momentos e actividades para a lembranza e para a convivencia, e a partir destes equipos comezáronse a lembrar e revivir equipos da historia do Club Baloncesto Seis do Nadal - Coia.

PRIMEIRO EQUIPO ALEVÍN MASCULINO DO CLUB - ANO 1987

2008-12-25T03:26:00.000-08:00

FINAL COPA DE VIGO CADETE FEMININA TEMPADA 2002/03

2008-12-25T03:21:00.000-08:00

CARTA DE DANIEL LANDESA: "O FUTURO NAS NOSAS MANS"

2008-12-25T03:12:00.000-08:00

Di Gardel no seu tango máis coñecido que vinte anos non son nada; pero ¿e vinte e cinco? Vinte e cinco anos son moito. Para un pequeno club de barrio que ten como principal obxectivo o de formar a rapaces e rapazas nunha cultura de vida saudable ligada ao deporte estes anos dan para moito, para moito traballo e para moitas ilusións.

Levo uns días lendo con atención cada un dos recordos que se están a plasmar nesta páxina dedicada ao vinte e cinco aniversario do Seis do Nadal. E despois destas lecturas tan proveitosas creo que non podo engadir nada máis que algún que outro recordo persoal e algunha que outra anécdota.

Eu cheguei ao barrio de Coia no ano 1977, e non foi ata oito anos despois que o deporte da canastra se cruzou na miña vida para facerse un inquilino permanente. Estudaba eu daquela no Eijo Garay, que ofreceu para ese ano 85 unha actividade de baloncesto a través dun monitor do desaparecido equipo do Skol.

Adestrábamos no patio exterior do colexio e cada un debía traer o seu propio balón, as canastras eran daquelas cedidas polo concello e co lema de “Por un Vigo Millor” moitos as lembraredes. Para o ano seguinte ingresei no Centro Deportivo Municipal, no grupo que adestraba Marisol Pahino, o baloncesto xa formaba parte de min.

Malia que dende sempre vivín a escasos cinco minutos do Colexio Seis do Nadal, acabei xogando no (xa desaparecido tamén) Mercantil de Vigo ata que no ano 1991 crucei por vez primeira co Seis do Nadal a través da sección que se creou no Instituto de Bacharelato Alexandre Bóveda, adestrado, como non por Aali, e do que falou Carlos na súa retrospectiva.

No 93 comecei a colaborar con Aali na dirección do equipo cadete do Instituto, e no 1994 quedei eu só co equipo cadete e co xuvenil, no que ademais era xogador. Aquel equipo cadete formado por ex-xogadores infantís do Seis do Nadal quedou durante dous anos consecutivos subcampión da liga recreativa na que competía. Finalmente no ano 1995 os meus estudos me levaron fóra da cidade e tiven que deixar aparcado o meu labor como adestrador.

Reincorporeime xa na tempada 98-99, outra vez para cubrir o espazo do Instituto Alexandre Bóveda cun equipo xuvenil das mesmas características que os anteriores, nesta ocasión na compaña inestimable de Óscar Carbajo. Dende aquela adestrei unha chea de xente, unhas cantas xeracións do club, dende equipos de mini ata xuveniles. A cantidade de recordos é moita.

Cadete Masculino "C" - Copa de Vigo (T. 03/04)

De todos os equipos que adestrei non quero quedar con ningún xa que todos tiveron as súas cousas e as malas, aínda que sempre gardarei un recordo especial dun par deles. A experiencia foi moi gratificante e quizais un día o volva ser. No camiño mancheas de amigos que, aínda hoxe conservo.

Na miña última etapa dende o ano 2002 ata o 2006 pasei a ser o encargado da imaxe gráfica do club. Asumín o duro traballo de xestionar unha páxina web que chegou pasar das 150.000 visitas anuais, só este dato dá idea do gran club do que estou a falar. Pero non foi só a web; durante eses anos procurei dar un xiro e coidar toda a imaxe externa do club: equipaxes, carteis, folletos, tarxetas, presentacións, e mesmo unha pequena revista.

Para min foi un pracer poñer o meu pequeno gran de area, de axudar dun xeito pequeno a que o Seis do Nadal funcionase como funciona. Se teño que quedarme con algo téñoo ben claro, a cantidade e calidade das persoas coas que tiven o gusto de traballar e convivir durante todos estes anos.

Dende o ano 83 as cousas cambiaron moito, o Seis do Nadal xa non pertence só a un populoso barrio obreiro da cidade, senón que forma xa parte da historia do deporte do noso país. Debemos estar orgullosos do noso pasado para traballar sempre con ilusión no presente, dese modo, o futuro está nas nosas mans.

Daniel Landesa.

CARTA DE SERGIO GONZÁLEZ: "O SEIS DO NADAL SOMOS TODOS"

2008-12-25T03:08:00.000-08:00

"25 Anos de Historia", "25 Anos co Deporte Base", "25 Anos en Coia, Núcleo de Baloncesto en Vigo". Todas estas frases marcan a realidade do que o Club Baloncesto Seis do Nadal - Coia viviu nestes 25 Anos e reflexa o traballo que a entidade realizou, realiza e de seguro seguirá realizando.

Gustaríame destacar nestas liñas a importancia deste blog que se creou co motivo da conmemoracion do 25º Aniversario. Un blog cun claro obxectivo: reunir nunha páxina web lembranzas, momentos reseñables da historia, convivencias, experiencias e, o máis importante, crear un lugar de encontro para a gran cantidade de persoas que durante estes anos viviron vinculadas dalgunha forma ao Seis do Nadal.

Comezamos a creación deste sitio web poñéndonos en contacto coas persoas que dirixiron nalgún momento a entidade, persoas que puideran guiar o traballo de recopilación de información e que puideran explicarnos como decorreu a historia, tempada tras tempada.

Pouco a pouco comezouse a correr a voz e a xente comezaba a mostrar interés por esta idea e lles atraía o feito de poder lembrar os acontecementos e as vivencias do seu paso polo club. E o máis importante é que a cada unha das persoas ás que chegaba a noticia, sentíase parte da historia e víase obrigada a participar e a volver a formar parte do que foi e sempre será o seu club.

Ata o día de hoxe aínda seguimos recibindo fotos e imaxes históricas, cartas de opinión e de felicitacións e un gran número de suxerencias para a festa do próximo sábado 27 de decembro.

Falando da festa que se organizará no Seis do Nadal como broche final da conmemoración do 25º Aniversario, dicir que a organización deste evento está envolto nun cariño e nunha delicadeza especial. Non soamente está sendo organizada pola Dirección actual se non que cada xeración esta deixando o seu graíño de area que de seguro cargará a nosa festa dun sentir histórico.

Para min e para tódalas persoas que traballamos día a día por e para o club, é toda unha honra ter a posibilidade de poder levar a cabo a conmemoración dos "25 Anos de Historia" nesta tempada 2007/08. Esta conmemoración comezou o pasado 1 de xaneiro deste ano 2008 e está a piques de rematar o próximo sábado 27 de decembro.

Neste espazo de tempo foron innumerables os actos e eventos que se fixeron para darlle a importancia que se merece ao 25º Aniversario. Para nos é moi gratificante que moitos xogadores e xogadoras do club, así como ex-xogadores e ex-xogadoras e persoas que colaboran connosco ao longo das tempadas, crean que a nosa entidade está sempre de aniversario (sempre é o 25º Aniversario), o que quere dicir que realmente o club está de celebración neste ano 2008.

Tamén e todo un pracer ver como ex-xogadores e ex-xogadoras, ex-adestradores e ex-adestradoras, ex-directivos e ex-directivas e persoas que estiveron no seu momento na entidade volven a mostrar interese polo Seis do Nadal con motivo do 25º Aniversario.

Para rematar a miña carta, carta que quero dedicar a todas aquelas persoas que axudan dalgunha forma a que estes "25 Anos de Historia" adquiran a importancia que realmente se merecen, e que poñen da súa parte para que se poidan seguir cumplindo moitos máis anos e celebrando moitos máis aniversarios, quixera transmitir o meu desexo de seguir camiñando no sendeiro que a día de hoxe o club está marcando pois penso que é o máis correcto e adecuado.

Sendeiro no cal cada persoa pertencente a entidade, desde xogadores, adestradores, directivos, socios, familiares, colaboradores, patrocinadores, ata amigos e coñecidos; son un punto de apoio de gran importancia no camiño a percorrer ano tras ano.

Do mesmo xeito, quería invitarvos a todos aqueles que estades lendo estas liñas a participar na festa do próximo sábado 27 de decembro, unha festa que pretende unir pasado, presente e futuro nunha tarde e nun mesmo espazo.

Vémonos o próximo sábado. Un sáudo a todos e todas.

Moitas grazas polo que estamos facendo e polo que estamos conseguindo.

FESTA NADAL 25º ANIVERSARIO DO C.B. SEIS DO NADAL - COIA

2008-12-15T00:29:00.001-08:00

O Club Baloncesto Seis do Nadal - Coia organizará unha festa de Nadal para conmemorar o 25º Aniversario, os "25 Anos de Historia co Deporte Base" da entidade, que terá lugar o próximo sábado 27 de decembro do 2008 no Colexio Seis do Nadal.

Este evento pretende ser unha das actividades máis importantes da Historia do Club Baloncesto Seis do Nadal - Coia, na cal o principal obxectivo é reunir nunha tarde a tódalas xeracións que pasaron pola entidade, reunir á historia do club.

Para comezar con esta gran Festa de Nadal ás 16:00 horas terán lugar partidos amigables entre os equipos federados que conforman o presente, o momento actual, do Club Baloncesto Seis do Nadal - Coia. Uns partidos que de seguro terán un ton, non soamente deportivo, senón tamén de convivencia e diversión.

Ás 18:00 horas comezarán os partidos interxeracionais, uns partidos que volverán a reunir na pista a antigos compañeiros de equipo e que achegarán ata as nosas pistas a moitas das persoas que no seu momento formaron parte do Club Baloncesto Seis do Nadal - Coia. Estes partidos serán a tempo continuo, é dicir, haberá cambios continuamente sen necesidade de parar o tempo, polo que de seguro pasarán pola pista e nun só partido unha gran cantidade de xeracións do que no seu momento foi o presente do club.

Unha vez rematado o partido interxeracional, ás 20:00 horas, terá lugar o momento máis emotivo e nostálxico deste evento. Nesta actividade se procederá ao visionado dunha presentación de diapositivas que pretende recoller os momentos máis importantes dos "25 Anos de Historia" así como os momentos máis divertidos e anecdóticos.

Despois desta lembranza, ás 20:30 horas, tódolos presentes compartirán unha merenda cea, cun obxectivo principal que é a convivencia entre as distintas xeracións que se xunten nesta data.

Para clausurar o evento non haberá mellor maneira que rematar cun baile de Nadal no que todos e todas pasaremos un gran momento cargado de diversión e máis convivencia.

Esperamos que o próximo sábado 27 de decembro podamos reunir a tódala Historia do noso club e ti tamén formas parte desa historia. Non faltes e axúdanos a transmitir a mensaxe.

ALEVÍN FEMININO T. 2005 / 2006 (XERACIÓN 1994)

2008-12-14T13:37:00.000-08:00

ALEVÍN FEMININO T. 2005/2006

CAMPIÓN LIGA DVB

BENXAMÍN FEMININO T. 2005 / 2006 (XERACIÓN 1996)

2008-12-14T13:34:00.000-08:00

BENXAMÍN FEMININO T. 2005/2006

SUBCAMPIÓN LIGA DVB

MÁIS FOTOS DA PRIMEIRA EDICIÓN DA LIGA INTERNA DE COLEXIOS

2008-12-14T13:28:00.000-08:00

CARTA DE JAIME RODRÍGUEZ: "UN REFLEXO DA FORZA DO NOVO CLUB"

2008-12-14T13:25:00.000-08:00

A idea final do escudo foi collendo forma tras varias reunións con Carlos Martínez, nas que pouco a pouco definimos o que, pensamos, debería quedar representado.

Xa desde un principio, en canto á forma, plantexamos o círculo para facer unha obvia referencia a un balón. Quedaría fragmentado en tres partes segundo as liñas do mesmo. En cada unha delas aparecería algo característicos do novo club.

O primeiro que pensamos representar foi a cidade á que pertence, inicialmente coa bandeira, que despois quedaría delimitada coa "V", o que ao final serviría como eixo central e separaría as tres zonas.

A esquerda, aínda que tiñamos a idea de plantexar algo referente ao baloncesto, quedámonos coa idea de que figurará un elemento da orixe, o vello escudo de Seis do Nadal que desde sempre figurara nas equipaxes e demais.

Ambos coincidimos en que non podía pasar sen un referente a un barrio tan característico coma o noso, polo que decidimos incluír o escudo de Coia.

Por último, pensamos en darlle un toque un pouco máis agresivo rodeándoo de lapas, tamén presentes en algún modelo de camisolas de adestramento e outras aplicacións, e que pretendían ser reflexo da forza coa que este novo club nacía e comezaba a súa expansión.

Jaimen

I LIGA INTERNA DE COLEXIOS LINCO 2003 DA HISTORIA DO SEIS DO NADAL

2008-12-04T00:18:00.000-08:00

MÁIS FOTOGRAFÍAS DE EQUIPO DOS "25 ANOS CO DEPORTE BASE"

2008-12-03T23:43:00.000-08:00

Son numerosas as fotografías e imaxes que están sendo recibidas no correo electrónico do club. Continuando co obxectivo de crear un arquivo de fotos da historia do Club Baloncesto Seis do Nadal - Coia pedimos a vosa colaboración coa finalidade de datar cada unha das fotografías que forman parte de dito arquivo.

Se alguén coñece a tempada na que foron tomadas estas fotografías de equipo e a categoría á que pertencen os seus integrantes rogamos deixedes un comentario nesta entrada ou enviedes un e-mail ao correo electrónico do club. Moitas grazas.

FOTOGRAFÍAS XERACIÓN 1991

2008-11-25T14:03:00.000-08:00

Benxamín Mixto

Alevín Feminino

Infantil Feminino

CORPO TÉCNICO DE ADESTRADORES E MONITORES NA HISTORIA

2008-11-25T02:19:00.000-08:00

Tempada 1999/2000

Tempada 2001/2002

Tempada 2002/2003

Tempada 2007/2008

Tempada 2008/2009

PRIMEIRAS IDEAS DO ESCUDO DO CLUB BALONCESTO SEIS DO NADAL

2008-11-21T05:37:00.000-08:00

FOTOS DE EQUIPO PRESENTACIÓN OFICIAL DO CLUB - TEMPADA 2001/02

2008-11-20T06:05:00.000-08:00

FOTOS DE EQUIPO PRESENTACIÓN OFICIAL DO CLUB - TEMPADA 2000/01

2008-11-19T06:29:00.000-08:00

Benxamín Mixto - Tempada 2000/01

Alevín Masculino e Feminino - Tempada 2000/01

Infantil Masculino - Tempada 2000/01

Infantil Feminino - Tempada 2000/01

Cadete Masculino - Tempada 2000/01

Cadete Feminino - Tempada 2000/01

NO ANO 1986 OS DEPORTISTAS DO SEIS DO NADAL VIVIRON A NEVADA

2008-11-19T06:03:00.000-08:00

ASÍ COMEZARON AS PISTAS DO COLEXIO SEIS DO NADAL

2008-11-19T05:54:00.000-08:00

CARTA DE FRANCISCO MARTÍN, PRESIDENTE DA FEDERACIÓN GALEGA DE BALONCESTO

2008-11-17T15:14:00.000-08:00

Un cuarto de século de éxitos.

O Club Baloncesto Seis do Nadal - Coia celebra este 2008 os seus 25 anos de vida co orgullo que dá botar a vista atrás e sentirse satisfeito do traballo realizado, tanto no seu propio ámbito de actuación como pola súa contribución ao desenvolvemento do baloncesto galego.

Como moitos dos clubs galegos o C.B. Seis do Nadal nace ao abeiro dun Colexio, e co apoio dunha Asociación de Pais, imaxinativa e ilusionada, que realizou un gran número de actividades tanto culturais como deportivas, que a longa, influíron e promoveron a fundación da man de Adrián Martínez, da Agrupación Deportiva Seis do Nadal.

O baloncesto no foi dos deporte máis solicitados nos inicios da Agrupación Deportiva, pero as mozas apostaron por el, e da man de Aalí Mohammed, empezouse a asentar o baloncesto e en especial o feminino.

O C.B. Seis do Nadal achegou un numerosísimo grupos de xogadores e xogadoras ao baloncesto da nosa Comunidade Autónoma, moitos dos/as cales vestiron a camiseta das nosas seleccións, tamén foi canteiras de exemplares directivos, árbitros, adestradores, etc.

Son moitos os eventos e actividades que organizaron en Vigo ao longo destes 25 anos e así se lle recoñeceu, concedéndolle o recoñecemento de “Mellor Club de Vigo e Comarca” pola Delegación Viguesa de Baloncesto en varias tempadas, e o “Premio Deporte na Escola 2003”, concedido pola Xunta de Galicia.

Por todo iso felicitámosvos, e felicitémonos, convencidos de que as innumerables éxitos deste cuarto de século poden quedar empequenecidos polos que aínda están por chegar. Ademais quixera destacar e felicitar á Xunta Directiva e colaboradores cuxa labor na sombra nunca será o suficientemente recoñecida.

Francisco Martín Micó.

Presidente da Federación Galega de Baloncesto.

"25 ANOS CO DEPORTE BASE" NOVO BLOG DO 25º ANIVERSARIO

2008-11-06T23:59:00.000-08:00

Neste ano, que xa remata, o Club Baloncesto Seis do Nadal - Coia está celebrando o 25º Aniversario, os "25 Anos de Historia" e para conmemorar esta data tan sinalada, o club inaugura un novo espacio web adicado aos "25 Anos co Deporte Base en Coia".

Neste nova web se lembrarán e se recollerán os grandes momentos que viviu o noso club ao longo do tempo, os logros conseguidos, así como tódolos cambios que a entidade tivo durante a súa evolución.

Este blog titulado "25 Anos co Deporte Base" contará con numerosas seccións que farán unha bonita e profunda mirada ao pasado da nosa entidade. Cun ton nostálxico e familiar nas entradas do sitio web sucederanse momentos inesquecibles vividos no Seis do Nadal, membros que pertenceron á nosa familia, opinións sobre a historia do noso club de persoaxes relevantes no baloncesto vigués e galego, etc.

O Club Baloncesto Seis do Nadal - Coia desexa que este novo espacio web sexa un novo punto de encontro para o pasado e o presente da entidade, un lugar onde poder lembrar o pasado, un pasado cargado de bos momentos que sempre permanecerán na memoria.

FESTA DO 25º ANIVERSARIO DO CLUB BALONCESTO SEIS DO NADAL

2008-11-05T23:49:00.000-08:00

O Club Baloncesto Seis do Nadal - Coia está preparando unha festa para conmemorar o 25º Aniversario, os "25 Anos de Historia co Deporte Base" da entidade, que terá lugar o sábado 27 de decembro do 2008 no Colexio Seis do Nadal.

A Dirección Deportiva e a Xunta Directiva da entidade están traballando nos preparativos para este evento que de seguro será un dos máis importantes da Historia do Club Baloncesto Seis do Nadal - Coia, no cal de seguro que se reunirán tódalas xeracións que pasaron polo club.

Un día de convivencia e de xuntanza que terá o obxectivo de xuntar por unhas horas a tódala historia do Club Baloncesto Seis do Nadal - Coia.

Tódalas actividades e horarios deste evento serán publicados nesta páxina web para información de tódolos interesados.

NAVEGANDO NO NOVO SITIO WEB: "25 ANOS DE HISTORIA"

2008-11-04T14:15:00.000-08:00

O Club Baloncesto Seis do Nadal - Coia creou un novidoso sitio web para conmemorar os seus "25 Anos de Historia" e facilitar un lugar de encontro onde se poidan reunir as distintas xeracións que pasaron polo clube así como crear un espacio onde publicar e arquivar tódalas lembranzas, imaxes e opinións da historia do club.

Este novo espacio web organizouse en diferentes apartados temáticos para facilitar a búsqueda das entradas a tódolos usuarios. Podesde atopar unha "Galería de fotos" onde atoparedes tódalas fotos históricas arquivadas pola entidade e tódalas aquelas que se consigan achegar por parte da familia do Club Baloncesto Seis do Nadal - Coia. Tamén atoparedes un apartado de "Grandes momentos" onde se publicarán aqueles momentos que marcaron un antes e un despois na traxectoria da entidade.

O apartado "Antes e despois" pretende arquivar e amosar fotografías do pasado e do presente de distintas personalidades da entidade, así como unha breve reseña da súa carreira deportiva durante o seu paso polo club. Tamén haberá unha sección para lembrar a un gran número de "Equipos" pertencentes ao Club Baloncesto Seis do Nadal - Coia cos nomes de cada integrante do equipo e coa tempada a cal pertence dita secuencia.

Tamén haberá unha sección de "Opinións" onde diferentes persoas relacionados co mundo do deporte da canastra e coa realidade da nosa entidade escribirán unha breve carta dirixida ao Club Baloncesto Seis do Nadal - Coia onde plasmarán unha felicitación, unha reseña, unha lembranza ou unha opinión sobre os "25 Anos co Deporte Base" que está a celebrar o noso club.

Co obxectivo de facilitar unha navegacion rápida e sinxela para tódolos ususarios deste novo espacio web, recoméndase acceder aos diferentes apartados ou seccións pulsando nos enlaces facilitados que atoparedes nas columnas laterais.

Esta recomendación débese á elevada cantidade de contido que xa se publicou nesta web e que se seguirá a publicar ao longo deste ano, polo que será moito máis sinxelo acceder ás entradas publicadas mediante a sección ou tema que se pretende consultar.

Do mesmo xeito, coa finalidade de crear unha páxina web dinámica e interactiva, invitamos a tódolos visitantes e usuarios a que deixen a súa pegada mediante comentarios nas entradas ou enviando as súas fotografías no club. Tódalas fotografías que se envíen ao correo electrónico do club serán publicadas na "Galería de fotos" co obxectivo de crear e gardar unha base fotográfica ampla e abundante.

Desde o Club Baloncesto Seis do Nadal - Coia, querémosvos animar a participar nesta páxina web e a ser partícipes deste "25º Aniversario" da nosa entidade.

PARTIDOS INTERXERACIÓNS NA FESTA DO 25º ANIVERSARIO

2008-11-03T15:15:00.000-08:00

Dentro da celebración da Festa do 25º Aniversario do Club Baloncesto Seis do Nadal - Coia, que terá lugar o próximo 27 de decembro do 2008, e coa idea de reunir a tódalas antigas xeracións da entidade realizaranse partidos interxeracións.

Partidos interxeracións cos que se pretende xuntar na pista á maioría ou á totalidade das xeracións que pasaron polo Club Baloncesto Seis do Nadal - Coia. O obxectivo principal é reunir na tarde do 27 de decembro a un gran número de xogadores e xogadoras, e ex-xogadores e ex-xogadoras para que poidan volver disfrutar dun partido amigable neste ano nos que se celebran os "25 Anos de Historia".

Para poder facilitar a organización de dito evento, invitámoslle e pregámoslle a tódolos antigos membros da entidade, anteriores a xeración do 1990, que desexen participar nestes partidos interxeracións, que envien un correo electrónico a baloncestoseisdonadalcoia@gmail.com indicando nome, apelidos e xeración á que pertence.

Desde o Club Baloncesto Seis do Nadal - Coia invitamos a todos aqueles que forman parte da historia da entidade a que se animen a participar nestes partidos interxeracións e poder así xuntar novamente na pista a un gran número de antigos membros, para poder revivir os grandes momentos que pasaron como xogadores e xogadoras das categorías inferiores.

NACE A AGRUPACIÓN DEPORTIVA SEIS DO NADAL: A NOSA ORIXE

2008-11-02T05:38:00.000-08:00

Corría o mes de setembro de 1982 cando, nun barrio de Coia en pleno crecemento e expansión, entraba en funcionamento un novo centro escolar, o Colexio Público Seis do Nadal, que deu novos bríos á actividade educativa, social e deportiva do seu entorno.

Coia era por aquel entonces un barrio deprimido e necesitado de todo tipo de servizos que vía crecer de xeito vertixinoso cada ano a súa poboación.

O feito de contar cunha comunidade educativa nova e ilusionada co seu posto de traballo, xunto co nacemento dunha Asociación de Pais e Nais de Alumnos loitadora e sacrificada, facilitou que no ámbito cercano deste colexio xurdiran unha chea de iniciativas que contaron con suficiente respaldo para tirar cara adiante, impulsando o asociacionismo desde tódolos ámbitos e ocupando o tempo libre dos nenos e nenas como prevención ante as lacras sociais do momento.

Naquel primeiro ano de vida escolar, o centro acolleu un sinfín de actividades culturais, recreativas e deportivas, froito das que logo naceron outras asociacións que traballaron a favor do noso barrio, entre elas, a Agrupación Deportiva Seis do Nadal.

Desta forma, tras organizar diversas actividades de promoción deportiva ó longo do primeiro ano de existencia del CP Seis do Nadal, no mes de Abril de 1983 se creou unha sección deportiva dentro do ANPA, onde tiñan cabida tódalas actividades deportivas organizadas por esta asociación: era o xerme inicial do noso club, as nosas orixes.

FOTOS DE FAMILIA DO CLUB BALONCESTO SEIS DO NADAL - COIA

2008-11-02T04:20:00.000-08:00

TEMPADA 1992/1993

TEMPADA 1997/1998

TEMPADA 1998/1999

TEMPADA 1999/2000

TEMPADA 2000/2001

TEMPADA 2001/2002

TEMPADA 2002/2003

TEMPADA 2003/2004

TEMPADA 2007/2008

CARTA DE FERNANDO VIDAL: "TODO COMEZOU NO SEIS DO NADAL"

2008-11-01T14:49:00.000-07:00

Fai 17 anos aproximadamente, polo ano 1991, comecei a miña etapa como xogador de baloncesto no Seis do Nadal aos 6 anos de idade. Os meus pais anotáronme porque ao ser máis alto que o resto de nenos da miña idade, pensaron que o baloncesto podería ser un deporte interesante para mín.

Os anos pasaban, e tras un largo e intenso traballo nas sesións de adestramentos con adestradores como Quique Pérez, Aalí Mohamed, Carlos Martínez ou David Fernández, entre outros, as chamadas das Seleccións de Vigo, Galicia e España non tardaron en chegar.

Fernando Vidal e Aalí Mohamed (1999)

Infantil "A" Seis do Nadal (1999)

Cadetes e Infantís Seis do Nadal (1999)

Numerosas foron as concentracións, partidos e torneos aos que asistín por toda a xeografía galega e nacional. Os Campionatos de España de Seleccións Infantís en Cataluña, foron un bo escaparate para que no ano 1999 se fixara en mín o xa extinguido equipo Siglo XXI de Lugo, propiedade da Federación Española de Baloncesto.

Tras un ano en dito equipo e apenado polo peche do mesmo, recibín unha gran sorpresa ao saber que tanto o TAU de Victoria como o F.C. Barcelona ofertábanme unha beca deportiva e de estudios. Decidín trasladarme a Barcelona, onde xoguei en categoría cadete e xuvenil durante tres anos.

Siglo XXI

F.C. Barcelona

Cos irmáns Gasol no F.C. Barcelona

Con Marc Gasol no F.C. Barcelona

Coa Selección Española Cadete conseguín a medalla de bronce no Europeo de Letonia no 2001, xogando con compañeiros de renome como Marc Gasol ou Rudy Fernández.

Unha vez finalizada esta experiencia volvín a Lugo, pero esta vez para xogar en categoría sénior en Liga EBA co Estudiantes e para adestrar co Leche Río Breogán de ACB. Tras tres anos en Lugo, volvín a miña cidade natal no ano 2005 para xogar no Gestibérica de LEB-2 durante dous anos. Actualmente, compaxino a miña xornada laboral xogando no equipo do C.B. Tui.

Campionato Europeo Cadete 2001 (Letonia)

Torneo Selección Española

Deixando a un lado o meu historial deportivo, sen lugar a dúbidas, o ano 2008 quedará na memoria de moitos como o ano do 25º Aniversario do Club Baloncesto Seis do Nadal - Coia. Esta celebración motivou a realización de numerosos eventos conmemorativos como torneos, 3x3, clínics, actos institucionais, etc.

Do mesmo xeito, son moitos os ex-xogadores/as que agardan con impaciencia e entusiasmo o partido interxeracional que se celebrará a finais de decembro. Persoalmente penso que é unha idea fantástica, xa que se volverá a reunir un gran número de antigos xogadores cos que poder revivir aqueles marabillosos anos envoltos en anécdotas e adestramentos baixo a choiva.

Hoxe en día, e grazas ao incesable traballo da Directiva do club ao longo dos anos, as melloras tanto a nivel organizativo como a dispoñibilidade de recursos materiais foron destacables. De todos modos, desde o meu punto de vista, os obxectivos do club, como os da maioría das empresas, deberían basearse nunha mellora continua, de tal forma que o inconformismo estivese presente no día a día, co fin de conseguir novos e mellores proxectos futuros.

A día de hoxe, ao meu parecer, estase a seguir esta filosofía, polo que desde estas liñas felicito a tódolos membros do Club Baloncesto Seis do Nadal - Coia para que sigan dito rumbo e que, algún día podamos, todos xuntos, celebrar o 50º Aniversario.

Un cordial saúdo. Fernando Vidal.

(Tódalas fotografías foron cedidas por Fernando Vidal)

INFANTIL MASCULINO T. 2001 / 2002 (XERACIÓN 1988)

2008-11-01T13:26:00.000-07:00

INFANTIL MASCULINO T. 2001/2002

CAMPIÓN GALEGO, FINALISTA INTERSECTOR

Quique B. (Ade.), Iván, Miguel, Gabriel, Guillermo, Fon (Ade.)

Pablo, Nacho, Felipe, Sergio, Dani, Iván

INFANTIL MASCULINO T. 1999 / 2000 (XERACIÓN 1986)

2008-11-01T11:32:00.000-07:00

INFANTIL MASCULINO T. 1999/2000

CAMPIÓN GALEGO, SUBCAMPIÓN INTERSECTOR

(1º TÍTULO AUTONÓMICO DO C.B. SEIS DO NADAL - COIA)

David (Ade.), Lucas, Roi, Miguel, Sergio, Brais, Carlos (Ade.)

Ruben, Jose, Xosé, Álex, Javi, Miguel

CARTA DE CARLOS MARTÍNEZ : CRECENDO EU E CRECENDO O CLUB

2008-11-01T05:01:00.000-07:00

Estimados amigos:

Carlos Martínez Vaqueiro Tempada 1998/1999

Quero agradecer, en primeiro lugar, o espazo que me cede o Club Baloncesto Seis do Nadal - Coia na súa web de presentación do 25º Aniversario de este club para facer unha breve reseña sobre este gran evento que conmemoramos. É unha honra para min formar parte desta familia baloncestística, e ter colaborado en certos aspectos para o crecemento e engrandecemento deste club no pasado.

Din moitas cousas a este club, pero tamén recoñezo que recibín moito máis a través do que aprendín e experimentei no comando do Seis do Nadal, e sobre todo a través do contacto con tantas persoas marabillosas coas que tiven o pracer de traballar.

Hoxe en día, despois de iniciarse a miña 5ª tempada lonxe da miña cidade e dos meus, e despois de formarme tamén no Área da Xestión Deportiva, teño outra perspectiva do traballo realizado no pasado. Moitas das cousas que aprendín e que experimentei na miña etapa como Coordinador de Baloncesto na AD Seis do Nadal - Coia (desde a tempada 1997-1998 ata a 2003-2004) as sigo aplicando no meu novo club en Portugal, o Grupo Desportivo da Gafanha; pero outras tiven que adaptalas ós novos tempos e ós novos contextos (sexan sociais e económicos, e no meu caso incluso culturais), desenrolando novas ideas para tratar de realizar un traballo similar ó realizado en Vigo no meu novo club.

Lonxe queda o ano de 1982 cando o Colexio Seis do Nadal iniciou a súa actividade.A miña familia acabábase de asentar en Coia, e eu iniciaba a Educación Primaria nese centro. Oito anos estudei no CP Seis do Nadal (onde realicei toda a EXB), e onde puiden participar en moitas actividades ofertadas por un centro escolar ben organizado e unha Asociación de Pais e Nais moi activa. Alí practiquei xadrez, atletismo, futbito, tenis, voleibol, bádminton e claro… baloncesto, que acabou por cautivarme máis que o resto de ofertas.

Por aquel entón, nos primeiros meses de 1983, empezouse a ofertar o Baloncesto, cunha gran adherencia do sector feminino. Aali Mohamed xa paseaba por aquel entón por este centro – gran exemplo de sacrificio, constancia e dedicación. Él foi o meu primeiro adestrador, nos meus inicios como xogador no ano 1986 (alevín de 1º ano). Logo tiven outros adestradores, como Rafa, Chipi, José Luis ou Rosana, pero sen lugar a dubidas foi Mohamed o que máis tempo me acompañou, do que máis aprendín e o que me motivou para ser adestrador no meu segundo ano de cadetes (1991-1992).

Equipo Alevín Masculino Tempada 1986/1987

Deixei de xogar ese mesmo ano de cadetes (a miña última tempada xoguei no equipo do IB Alexandre Bóveda “Coia-2” – onde estudaba), e só volvín á actividade cando na tempada 1999-2000 creamos o primeiro equipo Sénior Masculino na historia do Seis do Nadal (onde xogábamos case tódolos adestradores). A miña aventura nese equipo só durou 2 anos; logo deixei paso á xuventude, que xa reclamaba o seu espazo no equipo, e me centrei en labores técnicas e directivas.

Como dicía, iniciei a miña carreira de adestrador na tempada 1991-1992, como axudante de Aali Mohamed en alevíns e infantís. E á tempada seguinte xa era responsable por un grupo de Pre-benxamíns (a xeración de 1986), ós que acompañei durante 8 anos e cos que conseguimos moitos éxitos para o club – como o 1º título de Campión Galego na tempada 1999-2000. Paralelamente á dirección deste grupo, continuaba dirixindo outros grupos, ata o punto de que case tódolos xogadores e xogadoras das xeracións posteriores chegaron a estar baixo as miñas ordes nos anos seguintes.

En todo este tempo, estou orgulloso especialmente por facer un gran esforzo pola recuperación do baloncesto feminino, que tras anos de ostracismo volveu a emerxer na tempada 1997-1998 (cun equipo de infantís composto polas chicas das xeracións de 84, 85 y 86 e adestradas por David Fernández e por min). A este grupo seguiron inmensos grupos nos anos posteriores, garantindo a recuperación e continuidade do baloncesto feminino no club.

Pero os que me coñecen saben que do que teño máis orgullo é de haber invertido moito tempo e recursos nas Escolas e de haber creado un espazo de competición apropiado para a iniciación ó baloncesto, a Liga Interna de Colexios (LINCO). Este novo encadramento foi a base da pirámide no noso traballo durante anos, e propiciou sen lugar a dubidas o crecemento deste club ata os números que se manteñen na actualidade.

Clausura 1ª Edición Liga Interna de Colexios

Con todo, o éxito non é algo que apareza milagrosamente… hai que traballar duro, e nós o fixemos. A base do noso éxito era o grupo de traballo. Tódolos elementos técnicos do club éramos unha piña, e traballamos duro, co apoio e o respaldo de todos, para alcanzar os obxectivos que nos propuxeramos. Sen ese espírito de camaradería, sen ese sacrificio polo colega do lado, sen ese apoio constante entre tódolos adestradores, seria imposible alcanzar tódolos éxitos que alcanzamos.

Grupo Adestradores Tempada 1999/2000

A día de hoxe, síntome orgulloso de ver que aquela ‘obra’ da que fixen parte continúa funcionando, crecendo e desenrolándose, e que o Club Baloncesto Seis do Nadal - Coia segue sendo unha referencia para os clubs de Vigo e de toda Galicia.

O tempo foi pasando e o CB Seis do Nadal - Coia, en lugar de estancarse e involucionar, soubo adaptarse ós novos tempos:

- CAMBIOS NA DENOMINACIÓN: Os equipos do CP Seis do Nadal (desde 1983) deixaron paso primeiro aos da Agrupación Deportiva Seis do Nadal (a partir de 1987), que logo foron da AD Seis do Nadal - Coia (desde o ano 2000), para finalmente converterse no Club Baloncesto Seis do Nadal - Coia (a partir de 2004).

- MELLORA DAS INSTALACIÓNS: As pistas ao aire libre conseguiron tras anos de loita gañar un teito (ano 2000), para despois conseguir unha parede lateral para evitar que a chuvia entrase no campo (tempada 2001-2002), despois o peche doutras dúas paredes (tempada 2002-2003), e cando eu xa non estaba no club o peche da última parede (ano 2007) e a realización duns vestiarios e de oficinas do club (que aínda non están en funcionamento).

Mellora das instalacións Ano 2000

- CAMBIOS NA COORDINACIÓN DO CLUB: Aali Mohamed dirixiu a sección desde 1983, contando con Adrián Martínez a partir de 1986; en 1997 quedo eu como responsable da Coordinación do Baloncesto, entrando Pablo Álvarez como colaborador en 2002; a miña saída do club, na tempada 2004-2005, por fin o club consegue ter unha estrutura directiva sólida, quedando Pablo como Responsable Principal e Óscar Carbajo como segundo, sendo substituído por Sergio González en 2007; nesa mesma tempada 2007-2008, Pablo Álvarez deixa o club e Sergio queda como Director Deportivo do clube.

- NÚMERO CRECENTE DE PRACTICANTES: Na primeira tempada de funcionamento o club tiña 25 practicantes, chegando aos 50 en 1986 e aos 65 en 1997; despois, o crecemento foi vertixinoso: na tempada 1998-1999 xa había 120 practicantes, 220 acabaron a tempada 2000-2001, 350 practicantes na tempada 2002-2003 e 400 na miña tempada de saída do club, en 2004; despois, polo que me informei, os números seguiron crecendo, sendo que, nesta última tempada os números superan os 450 deportistas.

- GALARDÓNS DE ESPECIAL DESTAQUE: Con todo isto, convén destacar tamén algúns galardóns especiais, que foron puntos altos no crecemento deste club: Campións Galegos de Infantil Masculino en 2000, 2002 y 2006; Mellor Club de Baloncesto de Vigo en 2002, na 4ª Gran Gala do Deporte do Concello de Vigo; o Premio “Deporte en la Escola” de 2003 da Xunta de Galicia, á promoción deportiva en idade escolar; e os galardóns de Mellor Club da Delegación Viguesa de Baloncesto a partir da tempada 2001-2002 ata a actualidade, ano tras ano.

Entrega Galardón Tempada 2003/2004

E 25 anos despois da súa posta en funcionamento, aplaudo agora a organización do Acto de Conmemoración do 25º Aniversario por parte da actual Directiva do CB Seis do Nadal - Coia, a realizarse o 27 de Decembro do 2008 nas instalacións do CEIP Seis do Nadal, onde estarei presente con toda seguridade e onde espero encontrar moitas caras coñecidas (especialmente aqueles colegas que fixeron parte comigo dos primeiros equipos deste club).

Sería algo moi especial para min volver a ver os meus ex-compañeiros de equipo, a adestradores cos que traballei durante moitos anos, a xogadores e xogadoras que pasaron polas miñas mans, e a tódalas persoas que contribuíron nestes 25 anos de existencia do Seis do Nadal para engrandecer a entidade.

Desexo o mellor para a Directiva do club e para os seus actuais xestores, que realizaron tamén un traballo fantástico, e espero atoparos a todos nesta festa.

Un saúdo.

Carlos M. Vaqueiro

INFANTIL FEMININO T. 2000 / 2001 (XERACIÓN 1987)

2008-10-31T14:00:00.000-07:00

INFANTIL FEMININO T. 2000/2001

3º CAMPIONATO GALEGO, 3º CLASIFICADO INTERSECTOR

Jorge (Ade.), Ángela, Adela, Miriam, Laura, Natalia, Laura V.

Eva, Carla, Laura M., Rosalía, Isa, Ana

CARTA DE ÓSCAR CARBAJO: "UN GRAN CLUB E UNHA GRAN FAMILIA"

2008-10-31T13:56:00.000-07:00

De entrada, gustaríame dar os meus parabéns aos dirixentes do C.B. Seis do Nadal polas grandes ideas que teñen proxectadas para conmemorar o 25º aniversario do Club; supón un recoñecemento honroso ao labor desenvolvido durante anos por moitas persoas a creación da páxina web rememorando antigas pasaxes da historia do Club e a xuntanza de ex-deportistas que ten prevista o 27 de decembro que servirá de colofón para reverdecer tempos de xuventude e mocidade dos presentes no acto.

Así mesmo, agradezo a Sergio que me ofrecera a oportunidade de expresar a miña visión do Seis do Nadal durante os anos que formei parte del e tratarei de facer unha aproximación persoal e nostálxica do mesmo pois, para min, foron anos marabillosos dedicados a aprender e a ensinar baloncesto e relacións personais.

Eu cheguei ao Seis do Nadal no ano 1998, o espíriu que imperaba no Club era o dunha familia unida e estructurada. Tiñamos dous referentes claros, dunha banda contabamos con Alí como guía deportivo e esperirual; era a persoa que marcaba as pautas non escritas do club dende había anos; era a nosa fonte de coñecemento. Da outra banda, Carlos, quen a base de traballo movía os designios do Club a nivel federativo e a nivel estructural; era a man dereita de Alí e o seu alumno avantaxado.

Era reconfortante sentir a seguridade de saber que sempre podías contar con esas persoas para axudarte a resolver pequenos problemas do devir diario que para min, por aquel entón, eran grandes tarefas... Dende os meus inicios sempre atopei nesas persoas as palabras e os consellos necesarios para mellorar persoal e deportivamente. Ter o apoio permanente de Aalí e Carlos e ter por compañeiros naquel entón a persoas como Kike Celeiro, David, Dani, Jorge, María e Rodrigo (entre outros) foi definitivo para que eu me fora arraigando no mundo do baloncesto.

Son, sen dúbida, anos nostálxicos para min; lembro que cada logro do Club era de todos; recordo que no meu segundo ano no Club, eu xa estaba plenamente integrado, o equipo infantil “A” (a xeración do 86) foi campión galego e quedou a un paso de chegar ao campionato de España e todos seguimos a xesta como se fosemos patícipes da mesma. A ledicia que espertou aquel feito e outros moitos no Club eran enormes porque sentiamos que un trozo de nós estaba neses acontecementos.

O noso labor era apoiado por todos; compañeiros, pais e os propios xogadores!!! Neses anos eu aprendía moito máis dos meus equipos que os meus equipos de min. O primeiro equipo que adestrei foi aquel equipo xuvenil con Dani; nós tiñamos 19 anos e eles tiñan 16. Dese equipo leveime unha grande lección da que eu aínda non era consciente; dirixir a un grupo humano supuña unha tarefa dura, moito máis complicada do que eu me pensaba e ese ano serviume para aprender a ser máis responsable e gañei confianza para ofrontar novas temporadas.

Os primeiros tres anos que eu estiven no Seis do Nadal foron os mellores anos a nivel humano; aprendía moitísimo das persoas que tiña ao meu carón e gozaba coma ninguén cada actividade que realizaba o Club. O torneo de minibásquet, as viaxes a Aveiro e as convivencias de final de temporada eran eventos esperados por todos para facer deles unha festa de solidaridade e irmanamento; foron neses intres nos que se xestaron amistades que, pasados os anos, todavía perduran. Grazas Seis do Nadal polos grandes amigos que me deches.

Tras eses primeiros anos todo foi cambiando... O Club empezou a crecer a un ritmo de vertixe e pasou de ter 8 equipos (xa non me lembro con exactitude) a ter 20 equipos en apenas 3 anos. Ese crecemento súbito tivo varias causas; a máis importante foi, seguramente, o afán de superación de Carlos; él tiraba de nós constantemente, para el eramos unha parte importante do proxecto, igual que nun equipo os 12 xogadores deben ser importantes ao longo de toda unha temporada.

Outra das causas que propiciou o noso crecemento foi a asunción das Escolas Deportivas Municipais do Concello de Vigo e a entrada nos colexios de Coia; a canteira do Seis do Nadal pasou de ser un colexio, o colexio que da nome ao Club, a ser un barrio enteiro, o barrio máis populoso da cidade, e en realidade, coas Escolas Municipais, a procedencia dos nenos ampliouse a todo Vigo.

Entraron adestradores novos, procedentes doutros Clubs de éxito na cidade, con outras ideas, con outras maneiras de comprender o xogo e, aínda que da nova etapa saíron persoas que fixeron moito polo Club (Picher, Kike Perales, Pablo Álvarez e outros) o espíritu xa non foi tan familiar coma antes. A diversificación do Club supuxo un contraste claro de ideas e deu un salto de cualidade ao Club, un club que acadou o seu primeiro galardón de mellor club da Delegación Viguesa e Comarca a temporada 2001-2002 e que dende entón tódolos anos foi distinguido como tal (e suma 7).

Tódolos anos saía, recompensa ao traballo ben estructurado dende o Club e á calidade dos adestradores, equipos campións; a eses primeiros anos que vivín no Seis do Nadal seguíronlle anos de dominio en categorias de minibásquet (tanto masculino coma feminino) e grandes éxitos en infantís, sobre todo, e cadetes. Dos seguintes anos, eu gardo un recordo especial da xeración do 90. Tal vez con outros equipos conseguira cotas máis altas deportivamente falando, pero para min, os momentos vividos con este grupo son impagables.

Nos meus primeiros anos como adestrador eu disfrutaba do ambiente festivo que reinaba no Seis do Nadal e da amistade que estaba a fraguar coas persoas do meu entorno máis que co papel de adestrador propiamente; foi a xeración do 90 a que fixo crecer no meu interior a paixón desmesurada por ser adestrador de baloncesto. Tras dous anos xuntos, un de alevíns e outro de infantís, o terceiro ano foi incrible; ese ano estivo ateigado de momentos emocionantes...

Chegamos á final de Vigo contra todo prognóstico; ninguén esperaba que nós puidesemos astar aí, posiblemente nin nós mesmos e o desenlace foi tremendo; no partido de ida o Canteiras gañounos no Porriño por 45 a 60, resultado desolador que practicamente nos descartaba para obtelo título final e o partido estivo marcado pola ausencia do mancado Óscar Cos, a referencia do noso ataque.

A semana previa ao partido de volta dixemos que eran 4 puntos por cuarto e coa convicción de que podiamos levantar a eliminatoria acudimos ao Eijo Garay para xogar un gran partido... Ao descanso 20 a 21 e a cousa estaba cada vez máis difícil, e de súpeto aconteceu o inesperado, 24 a 5 de parcial no terceiro cuarto que nos deu alas ata o 59-41 final. Campións!!!

Despois veu a liga galega na que pasamos de segundos de grupo tralo C.O.B., campión galego aquel ano, e cruzámonos contra o Galicia do Ferrol para dirimir o acceso á Fase Final de Silleda... Esa foi outro gran enfrontamento; xogamos en días consecutivos, o sábado en Travesas cun resultado final de 67 a 58 a favor que nos deu esperanzas para viaxar ao Ferrol o día seguinte; pero sucedeu o inesperado e puxémonos 51 a 33 abaixo a falta de 6 minutos de partido; a súa defensa estaba a ser asfixiante e nos non acertabamos co tiro exterior; parecía que todo estaba perdido e o 3-20 de parcial deixou o resultado final en 54 a 53 que nos outorgou a clasificación para a fase final do campionato galego.

Alí perdimos contra o C.O.B. e o Cidade de Lugo para conquista-la medalla de “bronce” no último partido contra o Porriño. Foi gratificante ver como un equipo que quedara 16º de Vigo en alevíns pasou a ser 3º de Galicia dous anos despois... Foi sensacional!!!

Dous temporadas máis tarde, na tempada 2004-2005 Carlos Martínez, quen fora todo para o Seis do Nadal, decidiu dar un aire novo á súa vida e cambiou o Seis do Nadal polo Gafanha de Aveiro. As dúbidas que el tiña no momento de da-lo paso definitivo viñan por deixar o traballo de tantos anos nas mans apropiadas e escolleu como os seus sucesores no cargo a Pablo e a min.

Nun principio eu tiña as dúbidas naturais de quen emprende unha aventura nova; o listón estaba alto e en seguida troquei as dúbidas en ilusión e esforzo. Estiven tres anos con Pablo á fronte da Dirección Deportiva do Club e o noso pensamento estivo sempre centrado en continuar o formidable labor desenvolvido por Carlos as temporadas precedentes. Tratamos de moldea-las súas ideas aos novos tempos e propuxemos algunhas ideas novas tratando de sacar maior rendemento ás posibilidades do Club.

Na temporada 2007-2008 novos cambios na estructura directiva e deportiva do Club de Baloncesto revitalizárono e emerxeu a figura de Sergio, un rapaz novo, procedente das categorías base do club e que demostrou un entusiamo feroz por axudar a engrandecer as estructuras do Club.

Agora, xa dende a distancia que marca a rivalidade, o Seis do Nadal parece ter gañado moito en estabilidade e consenso para dotar á súa Base da solidez necesaria para sacar a flote a novos valores.

Dende a nostaxia e o cariño, desexo ao Seis do Nadal un feliz 25º aniversario!!!

Óscar Carbajo

INFANTIL MASCULINO T. 2005/ 2006 (XERACIÓN 1992)

2008-10-31T13:31:00.000-07:00

INFANTIL MASCULINO T. 2005/2006

CAMPIÓN GALEGO, FINALISTA INTERSECTOR

Aris, Ricardo, Aitor, Rafa, Rubén, Óscar (Ade.)

Pablo, Álex, Xurxo, Andrés, Lucas, Miguel

CARTA DE JORGE MARTÍNEZ: "UN GRAN CLUB POR E PARA A BASE"

2008-10-31T12:58:00.000-07:00

Con 9 anos comecei a miña andanza polo baloncesto, sempre unido a este club tanto como xogador como adestrador. Estos 18 anos vinculado ao club déronme moitas vivencias, grandes sensacións e unha gran unión dentro deste club, como se dunha familia se tratase.

Desde o meu primeiro día ata o día de hoxe o club foi evolucionando a marchas forzadas en instalacións (aínda lembro os días que adestrabamos baixo a choiva, feito que non facía que non disfrutaramos deste deporte), en adestradores (de 3 ou 4 que había para todo o club a tener o corpo técnico que temos na actualidade), e sobretodo en colaboracións (antes unha persoa tiña que facer moitas das labores que o club reclamaba e agora contamos cunha gran estructura de traballo onde a xente se esforza polo club).

A miña vida de baloncesto no club comezou en categoría benxamín, ata que en categoría cadete e júnior tiven que xogar co Helios Zorka por falta de xogadores no noso club, regresando a nosa entidade unha ver rematado este periplo.

Alevín Feminino Tempada 1998/1999

Infantil Feminino Tempada 1999/2000

Como adestrador comecei aos 16 anos cando me fixen cargo dun grupo Alevín Feminino co cal dos anos despois nos fixo lograr un gran éxito a nivel galego e chegando a disputar un Intersector do Campionato de España. Teño moi bo recordo deste grupo; en once anos que levo adestrando neste club quédome co recordo de tódalas rapazas que adestrei. Creo que parte do éxito dun grupo é a unión que pode chegar a haber entre xogadores, adestradores, familiares e club, e iso é o que fai grande a un club, e esa debe ser a nosa riqueza.

Aos 17 anos déronme a oportunidade de axudar nunha Selección de Vigo, da cal ao seginte ano xa me faría cargo, estando ao frente dunha selección zonal durante seis anos seguidos.

Benxamín Feminino Tempada 2007/2008

Personalmente gustaríarme destacar a labor de Aalí Mohamed como precursor do baloncesto neste club e a labor de Carlos Martínez como a perosa que coa súa dedicación fixo grande a este club. Tamén resaltar a gran labor dos adestradores pola súa labor desinteresada, por cariño a este club e creo que éste é o resultado, o cal me gustaría que seguise cara arriba.

Gustaríame tamén que tanto xogadores como pais tiveran confianza neste club, que ao meu parecer é un dos poucos por non dicir o único que se dedica de forma completa desde o primeiro rapaz ata o úlitmo desta entidade. Sen máis, agradecer todos estes anos e animar ás novas xeracións a seguir crecendo deportivamente e facer máis grande este club.

INFANTIL MASCULINO T. 2003 / 2004 (XERACIÓN 1990)

2008-10-30T08:08:00.000-07:00

INFANTIL MASCULINO T. 2003/2004

3º CAMPIONATO GALEGO

Pablo, David, Álex, Samuel, Nabor, Óscar (Ade.)

Miguel, Álex, Jacobo, Álvaro, Óscar, Daniel

CARTA DE ÁNXELES RIVELA: "O SEIS DO NADAL MÁIS QUE UNHA ESCOLA"

2008-10-30T06:02:00.000-07:00

Saúdos e noraboa por estes 25 anos!

Ánxeles Rivela (Curso Escolar 2008/09)

Parabéns para todos e todas os que hoxe forman (e formamos) parte do Club Baloncesto Seis do Nadal - Coia e que este aniversario sexa, polo menos, o comezo doutros 25 anos máis.

Cando Sergio, Director Deportivo do Club, me pediu un escrito para esta conmemoración non sabía por onde empezar. Supoño que lles pasa a tod@s. Podía facelo como nai, como mestra ou tamén como ex-directora do centro durante oito anos. Ao remate intentarei mesturar os tres ,posto que van unidos e non os din separado.

Cando cheguei como mestra ao Ceip: “ Seis do Nadal”, no ano 1997, o que menos se me ocorría era que a miña filla, Antía, se apuntase a facer baloncesto. Non había ninguén na familia que o xogara e descoñeciamos ese mundo e o do club. Pero cando comezamos a ver toda a dinámica deportiva que había no centro, falamos con outra xente que só falaba marabillas do club e sobre todo, ver aquela mocidade que ou estaba adestrando ou xogando ou vendo como o facían os amigos e amigas, decidimos que queriamos para Antía este ambiente.

Daba gusto ver unha mocidade sá, deportista, solidaria, responsables nos estudios, en fin o que calquera familia desexa para os seus fillos e fillas. O gusto polo deporte non se fabrica de súpeto ten que ir de vagariño, ás veces con problemas, porque gústanos máis ou menos este adestrador ou adestradora, as compañeiras ou compañeiros, ou non xogamos tan ben como desexamos e pensamos máis en nós que no equipo…

Pero a proba de que o Seis fixo, está facendo e seguro que o fará as cousas ben é que estes rapaces e rapazas que estaban nestes anos no Club aínda seguen en equipos séniors, de adestrador@s, de árbitros, de mesas…ligados ao deporte e en concreto ao baloncesto.

Como nai de xogadora, sufrín e alegreime como outros pais e nais cando iamos por todos eses pavillóns e, dependendo do ano, gañaban todo ou perdían moito. Pero sempre co afán de deixar ben alto ao Club e procurando desde as gradas animar e respectar aos contrarios. Nunca defenderei aos pais que desde as gradas insultan aos árbitros, adestrador@s contrarios, xogador@s, familias,etc .O deporte, xa desde pequenos , ten que servir para unir non para xerar violencia.

O Seis sempre insistiu nesto, en que o fundamental era que as nenas e nenos o pasaran ben, pero dun xeito educado. A xente : xogador@s, familias, adestrador@s que sexa irrespectuosa e violenta , por moi “crack” que sexa non debe ter cabida neste Club.

Cando Antía entrou no Club, no 1997, o responsable de todo era Carlos Martínez Vaqueiro. Detrás había moita xente que lle axudaba pero el era ( e sigue sendo) un foguete. Facía de todo. Na súa cabeciña cabía todo e empezou a soñar, e os soños fixéronse realidade. O Club cada vez se fixo máis grande. Comezou con nenos e nenas do colexio pero pouco a pouco foron vindo doutros sitios e cada vez había máis equipos, cos problemas que xeraba ter pistas para adestrar a tod@s. Non había onde adestrar a cuberto, as pistas estaban ao aire.

E nesto, no ano 1999, nomeáronme Directora do centro. Durante os 17 anos que levaba funcionando o centro os Equipos Directivos e as ANPAS traballaron arreo para mellorar as instalacións, deixando asinado o pavillón cuberto da actualidade. Tocounos a nós loitar para que se fixeran do mellor xeito posible. Ata , xunto co presidente da Agrupación Deportiva – Antón- tivemos que poñernos diante das máquinas para que non asfaltaran e puxeran o chan que lle correspondía!. As columnas tamén as querían poñer máis pequenas e non se poderían xogar partidos regulamentarios.

Logo, grazas a Santiago Domínguez, concelleiro de Deportes de entonces, pecháronse tres paredes e polo menos xa se podía entrenar e xogar sen que fixera tanto frío. Tamén, grazas a el como Director Xeral de Deportes da Xunta conseguiuse facer un local e vestiarios na parte de atrás do pavillón, aínda que con moitas dificultades por parte dos veciños, de Fenosa, da burocracia, dos cartos, etc levando as obras dous anos e aínda seguen sen rematar e poder utilizar os locais que tanta falla lle fan aos clubs de Baloncesto e Balonmán. Agardamos que sexa o máis pronto posible.

Neste tempo, ao longo, destes oito anos ao fronte do Equipo Directivo e da Comunidade Educativa, sempre procurei facer o posible para que o club fose para adiante, - ata Antón e eu nos fomos entrevistar con Fraga-, cedendo locais para reunións, axudando a que o Consello Escolar ampliara os horarios ata as 11 da noite,axudando en representacións oficiais do Club, animando ,mediando en conflitos, deixando facer fotocopias e utilizar teléfonos,etc,.

Tamén, durante este tempo mudáronse os estatutos da Agrupación Deportiva e pasou a ser o Club Baloncesto Seis do Nadal-Coia, tendo o seu propio presidente pero sendo o presidente da Agrupación Deportiva que os representa dentro do Consello Escolar do centro. Para min, unha das vantaxes e prodixios deste Club é que é o único de toda Galicia que pertence a un colexio público e que move tantos equipos e persoal dun xeito tan voluntarioso, traballando polo deporte base.

Non podía esquecer unha experiencia do Club, que me resultou moi satisfactoria e me fixo entender o baloncesto desde dentro: o Equipo de pais-nais. Só puiden xogar dous anos e teño que darlle as grazas ao adestrador - Anxo- e as compañeiras e compañeiros por ser tan pacientes comigo. Foi xenial cando fomos cos rapaces e rapazas do Club a Ponferrada, e gañámoslle aos do Club 6,25. Deixamos a bandeira do Seis ben arriba.

Ánxeles Rivela co Equipo de Pais e Nais (T. 2003/04)

Como nai sempre intentei que a miña filla fose unha rapaza do Seis, tanto do colexio coma do Club, e despois de once anos como xogadora, agora segue ligada ao Seis como segunda adestradora do Club dun histórico como é Aali e como árbitra axudando nos torneos. A pesares de ofrecerllo, nunca quixo - e nós tampouco- cambiar de Club, o Seis é como a súa casa e forma parte da súa persoa.

Neste Club formáronse xogadores e xogadoras e que pasaron moitos anos aquí e agora están noutros equipos. De xustiza é que cando falen tamén lembren o seu tempo aquí e non pareza que xurdiron por xeración espontánea, pois houbo moitas persoas que dedicaron o seu tempo e o seu esforzo para que este Club sexa o máis importante de Galicia e agora se esquezan del doe un pouco.

Xa remato, senón vai haber censura, polo da extensión do escrito. Só quería deixar o meu agradecemento e o da familia, a algunha xente que aínda está no Club e outra que estivo e que nun tempo tiven que relacionarme máis con eles e elas e agora xa non está: Antón, Amparo, Adrián , Carlos M., Pablo, Paco B., Outeiral, Chuca, Anxo, Sergio P., Giny, Iago, Rodrigo, Jorge, Carbajo, Marisol P., Enma, Fran,…e por suposto a Aalí por todos os anos que leva dedicado ao deporte base no Club.

Á Dirección do Club da actualidade desexarlle moita sorte na súa andaina, mandarlle moita enerxía positiva pois sendo tan mozos e mozas estanlle dedicando un montón de horas e esforzos a traballar cos nosos fillos e fillas, que non llos poderemos recompensar nunca. A Sergio, como cabeza visible do Club, moito agarimo e no meu nome e no de moitos mestres e mestras, pais e nais, moitas grazas e que llo transmitas a todos e todas os membros do Club polo ben que o seguides facendo.

Gustaríame que despois de 25 anos se siga dicindo: “ O SEIS MÁIS QUE UNHA ESCOLA” e “ TI TAMÉN ES O SEIS”.

Ánxeles Rivela Machado PARABÉNS PARA O CLUBE DE BALONCESTO SEIS DO NADAL - COIA.

CARTA DE ADRIÁN MARTÍNEZ: "O XERME INICIAL DO NOSO CLUB"

2008-10-28T15:12:00.000-07:00

O colexio comezou as súas clases no mes de novembro de 1982. Posteriormente un grupo de pais comezamos a traballar en busca de actividades deportivas e lúdicas, para que os nosos fillos non estiveran pola rúa fora do horario lectivo (entón o horario lectivo era ata as 17:00 horas).

Naquela época no ximnasio facíase ballet e no exterior facíase atletismo, futbito e baloncesto. A actividade de atletismo era impartida por un pai e o Club San Andrés, o futbito foi impartido por Fernando (adestrador do Sardoma) no seu inicio e posteriormente por Juan (conserxe do colexio e adestrado do Victoria) quedando o equipo subcampión de Vigo en alevíns. Un dos xogadores deste equipo alevín era Michel Salgado.

O adestrador da actividad de baloncesto era Miguel (xogador profesionial e xa falecido) pero meses despois contactouse con Aalí, facéndose cargo da Sección de Baloncesto e ampliando pouco a pouco as categorías.

Estas actividades eran gratis e non recibíamos ningunha axuda dos organismos e algúns padres facíamonos cargo dos gastos e desprazamentos a outros colexios para competir nas actividades correspondentes. Dímonos conta que a única forma oficial de que nos otorgaran algunha axuda era forma unha Agrupación Deportiva e posteriormente entrar a formar parte da Directiva do Deporte Base de Vigo (dependiente naquel entonces da Xunta de Galicia).

O Presidente desa novidosa Agrupación Deportiva fun eu, Adrián Martínez, tamén Presidente do A.P.A.; o tesoureiro foi Jose Suárez, delegado de baloncesto; o secretario foi Jose Luis Hernández, naquel momento Director do centro; e Pena, Charo, Ana, Aalí, Sampedro, Pili e outros figuraron como vocais.

Adrián Martínez (Tempada 1995/96)

No ano 1986 a actividade de futbito non teñe continuidade e decide non seguir debido a problemas de incompatibilidade de horarios da propia actividade co fútbol dos clubs externos. Isto fixo posible que se organizase a actividade de Balonmano dirixida por Moncho (adestrador con experiencia) e que deu salida, entre moitos outros, a Pablo Macías, actual xogador do Pilotes Posada.

Despois de moitas visitas ao Concello e a Educación conseguimos axudas e colaboracións que fixeron posibles ampliar o horario das actividades.

Posteriormente creouse a actividade de Bádminton (impartida por Moncho, pai dun alumno do centro) e que tamén deu os seus froitos chegando a xogar o Campionato de España con Carlos Martínez, Moncho Quiroga e Raquel. Tamén se chegou a impartir durante dous anos a actividade de tenis impartida pola Delegación de Tenis.

No ano 1985 creouse a actividade de Ximnasia Rítmica dirixida por Mª Carmen, actividade que provocou que no ano 1987 se creara a actividade de Ximnasia de Mantemento para Nais.

Tamén nos anos 90 estableceuse unha colaboración co Instituto Alexandre Bóveda (sendo o Director do centro Antón Piñeiro) para impartir bádminton, volei e baloncesto para que os nosos fillos tiveran continuidade no deporte.

Nesa época comeza a aumentar o número de deportistas no Balonmán e no Baloncesto, feito que nos leva a ter que aumentar o número de adestradores, aos cales se lles daba algún diñeiro por desprazamentos.

Despois desta breve lembranza aos primeiros anos da actividade deportiva do centro remato agradecendo a todos aqueles familiares, membros do A.P.A., adestradores/as e a todos aqueles que fixeron grande esta Agrupación todo o seu esforzo, sacrificio e dedicación para sacar adiante tan ambicioso proxecto.

CARTA DE AALÍ MOHAMED: "OS MEUS INICIOS POR CASUALIDADE"

2008-10-26T07:01:00.000-07:00

Fai 25 anos empecei a adestrar neste clube, por mor dunha casualidade. Eu era árbitro de baloncesto e un amigo meu, que iba empezar a adestrar no Colexio Seis do Nadal, pediume o favor de axudarlle coas regras dos xogos nos adestramentos. Ao cabo duns días o deixei porque discriminaban ás rapazas.

Unha mañá dun sábado de xaneiro de 1983, esas mesmas rapazas presentáronseme na miña casa pedíndome que lles dirixise o seu partido desa mañá, aceptei e ao final fíxenme o seu adestrador, non tiña nin idea de cómo nin que adestrar e fixen o que puiden. Nunca imaxinei que puidera durar tanto.

Equipo Benxamín Tempada 1995/96

Equipo Infantil Masculino Tempada 1997/98

Naquela época, os colexios públicos tiñan moitas actividades extraescolares, e non existía a garantía de que as actividades que había tivesen continuidade; sempre pensei que tarde ou temprano desaparecería dita actividade. Afortunadamente, para a existencia da nosa entidade houbo (e hai) xente que tiña gañas de traballar, refírome as APAS e as diferentes direccións do colexio.

Os comezos foron moi difíciles, había falta de medios económicos, materiais, coñecementos técnicos, etc..pero a pesar de todo, soubemos saír cara diante. Saquei o título de monitor para adquirir uns coñecementos técnicos e así poder adestrar cun mínimo de garantías.

Comprouse unha parella de canastras de minibáquet das que se carecía ata o momento e que, de non comprarse, eu non houbese continuado exercendo; esas canastras aínda se conservan a día de hoxe no club.

Equipo Alevín Feminino Tempada 1999/2000

Equipo Infantil Feminino Tempada 2001/2002

Durante algíns anos tívenme que multiplicar para poder adestrar aos nenos e nenas e poder asistir aos seus encontros. Afortunadamente, algúns dos rapaces que tiven ao principio creceron e lles gustou o mundillo do adestrador e axudáronme cos adestramentos. O máis significativo de eles foi Carlos Martínez Vaqueiro, un neno moi metódico que apuntaba todo e, o máis importante, gustáballe o que facía.

Teño que dicir que, seguramente, se non fose pola sua constancia e bo facer, non seríamos o club que hoxe somos. Propuxo crecer en categorías, abrirse a todo Vigo, e sobre todo a creación das Escolas Deportivas, polo que non houbo case ningunha obxección salvo no ámbito económico, xa que tódolos seus proxectos requerían de diñeiro.

Había que buscar recursos para poder crecer como Carlos quería. A falta dunha directiva, fixo que Carlos, o seu pai, presidente da Agrupación Deportiva, e algúns pais, empezaran a buscar os recursos necesarios. Por sorte, apareceu unha gran entidade que apostou e segue apostando polo deporte base, AUGAS DE MONDARIZ, a cal quero agradecerlle desde aquí a súa fidelidade co noso club, o cal grazas ao seu concurso puidemos crecer e crecer.

Grazas a todo o mencionado anteriormente, o noso club está considerado como o mellor en formación de toda Galicia. Isto soamente puídose conseguir polo traballo ben feito por todos e cada un dos adestradores, monitores, directivas, axudantes, pais do deportistas,… que formamos esta gran familia. Traballo que nos trouxo os froitos en forma de varios galardóns, entre eles, o mellor club de formación de Galicia.

Teño que dicir que me enorgullece e me chea de satisfacción saber que estos 25 anos serviron para que o noso club sexa un club recoñecido e a nosa labor alabada por todos, e tamén que durante estes anos fixen infinidade de amigos e amigas, tanto pais, nais como adestradores.

O meu maior desexo é que este club siga conmemorando máis e máis aniversarios como o que nos ocupa. Saludos afectuosos para todos.

Aalí

FERNANDO VIDAL, UN DOS GRANDES CANTERÁNS DO SEIS DO NADAL

2008-10-24T07:23:00.000-07:00

Fernando Vidal, nado en Vigo no ano 1985, foi xogador das categorías inferiores do Club Baloncesto Seis do Nadal - Coia ata os 14 anos, idade na que abandonou o club para despegar como xogador de baloncesto.

Despois dun ano no Centro de Alto Rendemento do Siglo XXI, foi becado polas filas do F.C. Barcelona, equipo no que estivo tres tempadas. Máis tarde militou na Fundación Breogán de Lugo onde chegou a ser convocado co primeiro equipo en Liga ACB.

Fernando Vidal foi un dos xogadores do Gestiberica - Cidade de Vigo no ano da súa creación na tempada 2006/07, ano onde o equipo competiu na Adecco LEB Bronce. Na tempada 2007/08 Fernando mudouse ao C.B. Valls (Barcelona) para competir na Liga EBA.

As categorías inferiores da Selección Española de Baloncesto tamén foron visitadas por Fernando Vidal quen tamén garda no seu palmarés unha medalla de bronce conseguido no Europeo Cadete celebrado en Riga (Letonia) no ano 2001.

Fernando Vidal desde que comezou no Club Baloncesto Seis do Nadal - Coia ata o día de hoxe mostrou unha gran fidelidade e unha gran solidariedade pola entidade. Este gran xogador, pero mellor persoa, sempre que lle é posible non dúbida en acudir ao noso club para participar e colaborar nas diferentes actividades, torneos ou eventos que se organizan.

CARLOS MARTÍNEZ, CONSOLIDANDO UNHA GRAN ESTRUTURA DEPORTIVA

2008-10-24T07:12:00.001-07:00

AALÍ MOHAMED, UNHA GRAN VIDA XUNTO AO DEPORTE BASE EN COIA

2008-10-24T06:59:00.000-07:00

Aalí Mohamed, un dos creadores e promotores do noso club, leva gran parte da súa vida adicada ao baloncesto. El foi unha das pedras angulares sobre as que o noso clube medrou e evolucionou.

Aalí leva máis da metade da súa vida polas nosas pistas de baloncesto, polo noso noso Club Baloncesto Seis do Nadal - Coia, sempre prestando atención á mellora integral dos nenos e nenas.

Sendo árbitro, adestrador e director técnico de baloncesto, pódese asegurar sen lugar a dúbida, que Aalí Mohamed é un referente a seguir e unha das persoas das que máis se pode aprender.

Na actualidade Aalí Mohamed forma parte do corpo técnico de adestradores do Club Baloncesto Seis do Nadal - Coia e é o Presidente de Honra da entidade. Xa pasaron anos desde o inicio do noso club no ano 1983 pero Aalí continúa, cunha forza sen igual, vinculado ao deporte base de canteira.

ALEVÍN FEMININO T. 2007 / 2008 (XERACIÓN 1996)

2008-10-21T13:05:00.000-07:00

ALEVÍN FEMININO T. 2007/2008

CAMPIÓN GALEGO

Ainhoa, Sara D., Marcos (Ade.), Andrea M., Sara F., Ainhoa

Andrea L., Irene, Irea, Alicia, Sara A.

INFANTIL FEMININO T. 2004 / 2005 (XERACIÓN 1991)

2008-10-20T12:58:00.000-07:00

INFANTIL FEMININO T. 2004/2005

SUBCAMPIÓN GALEGO

Emma (Ade.), Jéssica, Abi, Marta, Guada, Carla, Antía, Marisol (Ade.)

Leticia, María, Sandra, Aitana, Iria

CARTA DE Mª LUZ DACOSTA: "O EIJO GARAY NA HISTORIA DA ENTIDADE"

2008-10-15T08:04:00.000-07:00

A miña chegada ó barrio de Coia coa familia,en 1983, como veciña dunha cooperativa de vivendas de traballadores de Vulcano, coincide no tempo coa inauguración do CEIP Seis Do Nadal, que viña a incrementar a oferta educativa dun barrio en crecemento, con moitos problemas de infraestructura.

Corrían tempos difíciles para os veciños do barrio, traballadores a maioría, inmersos nunha crise económica e laboral importante: paros, regulacións, folgas... O traballo en conxunto, as asociacións, eran a maneira de saír para adiante.

Neste barrio e con estas circunstancias, aproveitando a forza dun colexio novo, cun Claustro de profesores ilusionado e unha Asociación de Pais que sabían o que querían e necesitaban para ós seus fillos, naceu o Club de Baloncesto Seis de Nadal, onde traballaron, e aínda están a traballar, algúns ben queridos veciños, amigos e incluso compañeiros meus.

A miña vinculación co Club é ben escasa: levo un par de anos dirixindo o CEIP Dr.Eijo Garay, que dende hai tempo cede as súas instalacións deportivas ó Club Seis Do Nadal para os adestramentos e competicións. Compartimos tamén alumnado, monitores e actividades nas súas escolas deportivas.

A Comunidade Escolar do CEIP Dr. Eijo Garay considera que esta é a mellor maneira de aproveitar as nosas instalacións fóra do horario escolar: actividades deportivas para os xóvenes do barrio, actividades que o Club Seis Do Nadal, pola súa andaina, sabe realizar mellor que ninguén.

No seu 25 aniversario, as persoas que traballamos no CEIP Dr. Eijo Garay queremos felicitar ó Club Seis Do Nadal polo seu traballo realizado, co desexo de que a seu labor no deporte base continúe no noso centro durante moitos anos máis.

NORABOA

Mª Luz Dacosta. Directora do CEIP DR. Eijo Garay

CARTA DO PRESIDENTE E DA XUNTA DIRECTIVA DO SEIS DO NADAL

2008-10-15T08:00:00.000-07:00

O azar quixo que durante este ano da nosa pasaxeira e esperemos que positiva estancia ao fronte do Club Baloncesto Seis do Nadal - Coia, celebrárase o seu 25º aniversario, feito que viño a reforzar o noso compromiso e motivación, á vez que orienta as nosas decisións ante a sempre difícil tarefa que suporá, chegado o momento, pasar o testito en boa situación aos futuros dirixentes do Club.

Pouco podemos relatar da enriquecedora e importante historia do Club que non se coñeza xa, dado que a estancia ao mesmo da maioría de nos data de non moitos anos como socios e menos aínda como directivos; polo que gustosos deixamos esta tarefa a persoas con maior coñecemento de causa e de forma especial a aquelas que contan no seu haber coa honorífica condición de fundadores e fundadoras.

Non obstante, podemos dicir que os feitos falan por si mesmos e que aquel soño inicial duns poucos é xa desde fai anos unha puxante e firme realidade: ¡Baloncesto de formación ao alcance de todos e todas! sen distinción de xénero, raza, clase social, etnia, relixión, lingua, etc.

Por iso debemos agradecer a todos e todas os que nos precediron, presentes e ausente: directivos, socios, adestradores, patrocinadores e colaboradores, persoal dos colexios onde traballamos, deportistas, seguidores, etc., o gran esforzo realizado, pois sin eles o noso actual grado de participación, formación e desfrute non serían posibles.

Aos que por diferentes motivos xa non participan activamente no club, todavía vos queremos pedir un último esforzo: manter vivo dalgunha forma o vínculo co club que tan importantes momentos vos proporcionaron, colaborando nas múltiples facetas necesarias para o desenvolvemento da súa importante e beneficiosa actividade, aínda que soamente sexa desde a condición de socios simpatizantes.

Pois un fenómeno social como o Club Baloncesto Seis do Nadal - Coia soamente é posible co continuado esforzo e empeño de todos. E de verdade que vale a pena, pois non hai dúbida de que é un dos mellores legados que podemos deixar aos nosos fillos e fillas e futuras xeracións. ¡Poucas cousas hai máis importantes que incorporar o deporte base na vida dun neno ou xove, e máis nos tempos en que nos toca vivir!

Para rematar, desexarvos a todos e todas que esta celebración sexa un satisfactorio reencontro persoal e sirva de lembranza dos mellores momentos que vivíchedes na vosa etapa no Club.

¡Grazas e noraboa por logralo! ¡25 anos é unha gran meta que nos fai seguir traballando e soñando como en 1983 o fixeron os noso fundadores!

Presidente do Club Baloncesto Seis do Nadal - Coia en representación da Xunta Directiva.

ARQUIVO DE FOTOS

2008-10-10T08:04:00.000-07:00